Institute for War and Peace Reporting | Giving Voice, Driving Change

د ځوانانو مناظره: د رايې اچولو د درغليو خطر له ورايه بريښي

By Mohammad Khan Raihan

په افغانستان کې د محمدخان ریحان لیکنه

د پکتيا پوهنتون محصلانو د حملپه ټاکنو کې د احتمالي درغليو په اړه اندېښنه څرگنده کړه.

د دسمبر په ١٧ د آی ډبليو پي آر په يوې مناظرې کې گډون کوونکو محصلانو له ويناوالو وپوښتل چې د رايې د ورکولو د روڼتيا او شفافيت په اړه کوم گامونه پورته شوي او د کومو تگلارو له مخې خلک کولای شي د رايو د ناسمو کارولو په اړه رپوټ ورکړي.

په پکتيا کې د افغانستان د بشري حقونو د خپلواک کميسیون د څانگې د ارزونې او څارنې مسوول، سيد حبيب الله عابدي په برالا وويل، چې "ښايي بهير له ستونزو خالي نه وي."

خو هغه ټينگار وکړ، تاريخي ټاکنې، چې له مخې به يې د افغانستان په تاريخ کې د لومړي ځل لپاره واک په سوله ييز ډول يو نوي ټاکل شوي ولسمشر ته سپارل کيږي، د خلکو د وياړ او افتخار نښه ده.

هغه د مناظرې برخوالو ته وويل: "ښايي ټاکنې له ستونزو خالي نه وي، ځکه دا بهير موږ ته نوی دی. نړيواله ټولنه په دې ډگر کې لويه تجربه لري. دا د افغانانو لپاره د وياړ ځای دی چې له ستونزو سره سره په دې ټاکنو کې برخه اخلي."

په پکتيا پوهنتون کې د جوړې شوې مناظرې نور ويناوال د فرهنگي چارو ماهر او د مدني ټولنې فعال، عبدالهادي حماس، د حقوقو او سياسي علومو استاد، رحمت الله لېوال او د پکتيا ولايت د ټاکنو په خپلواک کميسیون کې د عامه پوهاوي د څانگې مشر، شېرعلي فيضي وو.

د حقوقو د پوهنځي محصل، جهادالله وپوښتل د ټاکنو څارنه د کومې ادارې دنده ده او څنگه شکايتونه ثبتيږي. هغه وويل، د هغه زياتره انډيوالان د رايې ورکولو د څارنې په اړه معلومات نه لري.

حماس وويل، د ټاکنو خپلواک کميسیون د ټاکنو مسؤوليت لري، په داسې حال کې چې د ټاکنو د شکايتونو د اورېدلو کميسون د فساد د ادعاگانو د څېړلو دنده پر غاړه لري.  

هغه وويل: "په مخکنيو ټاکنو کې يو شمېر شکايتونه ثبت شوي وو، خو چايې په اړه هيڅ اقدام ونه کړ. دا پلا خلک د ټاکنو د شکايتونو د اورېدلو له کميسیون څخه ډېره تمه لري. کميسیون به هرې راولاړې شوې پوښتنې ته ځواب وايي."

فيضیبرخوالو ته ډاډ ورکړ چې د ٢٠٠٩ په پرتله اوس د افغانستان د ښو او اغېزمنو ټاکنو د سرته رسولو جوگه دی.

نوموړي په ټينگار وويل، د درغليو په اړه به هر مستند شکايت په جدي ډول تر کتنې لاندې ونيول شي او له برخوالو يې وغوښتل چې د ټاکنو له خپلواک کميسیون سره مرسته وکړي.  

هغه گوته وڅنډله: "که د ټاکنو د خپلواک کميسیون او خلکو تر منځ همکاري نه وي، نو د رڼو ټاکنو سرته رسول به ډېر ستونزمن وي. همکاري په دې بهير کې ډېر اهميت لري."

محمدخان ريحان د پکتيا پوهنتون محصل او د آی ډبليو پي آر تر روزنې لاندې خبريال دی.

 

 

 

As coronavirus sweeps the globe, IWPR’s network of local reporters, activists and analysts are examining the economic, social and political impact of this era-defining pandemic.

VIEW FOCUS PAGE >

Also in This Issue

ARR Issue 478