Institute for War and Peace Reporting | Giving Voice, Driving Change

د ځوانانو مناظره:د نارينه گانو له خوا د ښځو د رايه ورکولو مخنيوی تر ټوله ستره ننگونه ده

By Uzra Aziz

په افغانستان کې د عذرا عزيزيليکنه

څنگه چې هېواد د ولسمشر، حامد کرزي د ځايناستی د ټاکلو په درشل کې دی، د هرات ولايت د غوريانو د ولسوالۍ محصلانو د ټاکنو اړوند پراخو موضوعگانو په اړه له ځايي چارواکو څخه پوښتنه وکړې.

هغو محصلانو، چې د جنورۍ په ٢٣ د آی ډبليو پي آر له خوا په يوې رابلل شوې مناظرې کې گډون کړی وو، د ښځو د حقونو، په ټاکنو کې د ځوانانو د رول او د رسنيو د دندو په اړه د زياتو معلوماتو د ترلاسه کولو لېوال وو. 

د کريمي په نامه يو گډونوال له ويناوالو وپوښتل، ولې ښځې خپلو ځانونو ته زحمت ورکوي او د اپرېل د پنځمې نېټې په ټاکنو کې ونډه اخلي، که ونډه واخلي، نو په لاره کې پراته خنډونه به يې څه وي.

د غوريانو د ولسوالۍ د ښځو د چارو د شورا مشرې، ماهجبين حنفي وويل: "ښځې په ټاکنو کې د رايه ورکولو لپاره د نارينه گانو په څېر حقونه لري. هغوی دې هر هغه نوماند ته رايه ورکړي، چې غواړي يې، ځکه رايه يې د افغانستان برخليک بدلولای شي."

حنیفي وړاندې وويل، ولې د غوريانو ډېری ښځې ښايي په ټاکنو کې گډون و نه کړای شي. 

هغې وويل: "کاواکه امنيت، د ليک لوست د کچې ټيټوالی او د حقونو په اړه د پوهې نشتوالی هغه لاملونه دي چې کېدای شي د رايه ورکوونکو ښځو شمېر محدود کړي. خو دوديز خنډونه، چې نارينه گان ښځې رايې ورکولو ته نه پرېږدي، تر ټولو ستره ننگونه ده."

د شکيلا حقدوست په نامه يوې مدنې فعالې دا خبره ومنله، زياته يې کړه: "که نارينه گانو ته د اسلامي زده کړو له لارې د ښځو حقونه ور ونه پېژندل شي، نو ښځې به له دې ستونزې لاس او گرېوان وي."

د کابل د پوليتخنيک پوهنتون د رياست مرستيال، حميد سيرت صمدي له ويناوالو وپوښتل، ښځې رايه ورکوونکې بايد د ولسمشر په توگه د نوماندانو کومې ځانگړتياوې په پام کې ونيسي.

حنیفي په ځواب کې وويل، د حامد کرزي ځايناستی بايد يو "رښتينی"شخص وي چې له عادي افغانانو سره پر مرستې ټينگ باور ولري. هغې زياته کړه: "هغه بايد د ښځو حقونو ته ځانگړې پاملرنه وکړي."

په پای کې د مناظرې برخوالو محصلانو له ويناوالو څخه د رسنيو د رول او دندې په اړه پوښتنې وکړې.

د غوريانو د پوهنې د مديريت وياند، محمد شريف سلجوقي رسنۍ د حکومت او د ولس تر منځ "پل"وباله. هغه په ټينگه وويل چې رسنۍ د رايو په ورکړه او تنظيم کې ډېر مهم رول لري.

عذرا عزيز  د هرات پوهنتون محصله او د آی ډبليو پي آر تر روزنې لاندې خبرياله ده.


 

As coronavirus sweeps the globe, IWPR’s network of local reporters, activists and analysts are examining the economic, social and political impact of this era-defining pandemic.

VIEW FOCUS PAGE >

Also in This Issue

ARR Issue 478