Institute for War and Peace Reporting | Giving Voice, Driving Change

افغانان فساد يو دردوونکی ميراث بولي

بډي اخيستل د سيمه ييزو او مرکزي حکومتي ادارو گډه ناروغي ده
By IWPR staff

په افغانستان کې د ای ډبلیو پی ار ژونالیستانو لیکنه

په افغانستان کې د آی ډبليو پي آر له خوا په وروستيو تنظيم شوو مناظرو کې برخوالو فساد د پخواني ولسمشر، حامد کرزي او د طالبانو د پېر يو گډ دردوونکی ميراث وباله.

د بادغيس، بغلان او کاپيسا ولايتونو اوسيدونکو وويل، حکومت پخپله په بډو او فساد کې ښکېل دی، نو ځکه نشي کولای په دې درېو ولايتونو کې د پراخ فساد په وړاندې مقابله وکړي.

په بغلان ولايت کې د مناظرې گډون کوونکې، بصيرې صفدري د ولايت له وياند، محمود اکمل څخه وپوښتل، ولې د دې ځای سړکونه دومره ناوړه حالت لري.

اکمل له هغې سره يوه خوله و چې د بنسټيزو خدمتونو کچه خورا ټيټه ده، ويې ويل: «د سړکونو ناوړه حالت د بغلان د ولايت نيمگړتيا نه ده، د درغلۍ سرچينه په کابل کې ده.»

د مدني ټولنې يوه استازي وويل، ولايتي اداره دنده لري چې د خپلې نيمگړتيا بار پخپلو اوږو واخلي.

د عبدالقادر په نامه د مدني ټولنې نوموړي فعال وويل: «موږ د بغلان په ځايي حکومت کې د فساد پر شتون سترگې نشو پټولای.» هغه زياته کړه، د ترهگرۍ په وړاندې روانې جگړې د دې ستونزې په وړاندې مقابله ستونزمنه کړې ده. 

په کاپيسا کې د مناظرې برخوال، د نجراب ولسوالۍ د لوکاخېلو د کلي اوسيدونکي، پيرمحمد وويل، په حکومتي پروژو کې شفافيت د فساد د مخنيوي تر ټولوغوره لاره ده.

يوه ويناوال ومنله چې بډې او شوکه په حکومتي ځايي ادارو، په تېره بيا د پوهنې په ډگر کې يوه عامه خبره ده. په مناظره کې د کاپيسا د پوهنې د رياست استازي، محمد ناصر وويل، هغه زيات ډاډمن نه دی چې د ولسمشر، اشرف غني له خوا د ماليي نوی ټاکل شوی وزير دې بنسټيز بدلونونه راوستلای شي.   

د بادغيس ولايت د مقر په ولسوالۍ کې د ځوانانو د ځايي ټولنې غړي، محمد اصف باهر وويل، په دې ولايت کې زده کړه د فساد او جگړې له امله زياته زيانمنه شوې ده.     

باهر وويل، د مقر د ښوونځيو زياتره ښوونکي له خپلو حقونو ناخبره دي او له دې امله د دايمي ښوونکو پر ځای د قرارداديانو په توگه گومارل شوي چې د قانون له مخې تر لږ حمايت لاندې دي.

هغه وويل: «حقيقت دا دی چې د پوهنې چارواکي نه يوازې هغوی ته د اصلي معاش په پرتله لږ معاش ورکوي، بلکې هره مياشت ترې بډې هم اخلي.»

د باهر د وينا له مخې د فساد او کمزوري تدريسي معيار له امله زده کوونکي ښوونځيو ته له تگ څخه زړه تورن شوي دي

As coronavirus sweeps the globe, IWPR’s network of local reporters, activists and analysts are examining the economic, social and political impact of this era-defining pandemic.

VIEW FOCUS PAGE >