د ځوانانو مناظره: د رايپاڼو کمښت، ستره اشتباه
د ځوانانو مناظره: د رايپاڼو کمښت، ستره اشتباه
په افغانستان کې د محمد عارف انوري ليکنه
د بلخ شمالي ولايت د يو پوهنتون استاد د اپرېل د پنځمې نېټې په ټاکنو کې د رايپاڼو د کمېدو له امله د ټاکنو پر چارواکو نيوکې وکړې
نوراغا شريفي د می د مياشتې په ١٤ نېټه د آی ډبليو پي آر د مناظرې گډون کوونکو ته وويل، زرگونو خلکو ساعتونه ساعتونه په اوږدو ليکو کې د ځاني خطر په منلو د رايې ورکولو د مرکزونو مخې ته تېر کړل، خو په پای کې يې ونشو کړای رايې ورکړي.
هغه وويل، دا ستره ادارې اشتباه د هغوی په وړاندې د طالبانو له عمل سره انډول وه، ځکه د هغو موخه هم د افغانانو د رايې ورکولو مخنيوی و.
شريفي وپوښتل: "د طالبانو د غوښتنو او د ټاکنو د خپلواک کميسون د دې کړنو تر منځ څه توپير دی، چې ويې نه کړای شول خلکو ته د رايې ورکولو پاڼې ورسوي؟ زما په اند هيڅ توپير نه لري. طالبانو نه غوښتل چې خلک دې په ټاکنو گډون وکړي او کميسون ونشو کړای رايه ورکوونکو ته د رايو ورکولو پوره پاڼې چمتو کړي او خلک يې له رايې ورکولو څخه بې برخې کړل. زه د دې دوو کړنو د پايلو تر منځ کوم توپير نه گورم."
د طالبانو مشران گوته څنډي چې که چا، د جون د مياشتې په ١٤، په دويم پړاو ټاکنو کې گډون وکړ، نو غچ به ترې واخيستل شي.
د آی ډبليو پي آر مناظره په بلخ پوهنتون کې جوړه شوې وه او له اتياوو څخه زياتو محصلانو پکې گډون کړی وو. په مناظرې کې پر شريفي سربېره د بلخ ولايت د ټاکنو د خپلواک کميسون د ولايتي څانگې د عملياتو مرستيال، اجمل احدي هم گډون کړی و.
د احمد حامد عابدي په نامه يوه محصل وپوښتل، د ټاکنو چارواکو ولې د هغو خلکو نومونه په ډاگ نه کړل چې د ټاکنو د لومړي پړاو په درغليو کې يې لاس درلود.
نوموړي د ټاکنو پر خپلواک کميسون غږ وکړ چې د رايې ورکولو تر شک لاندې کړنې په ډېر شفاف ډول يو ځل بيا تر غور لاندې ونيسي.
هغه د مناظرې گډون کوونکو ته وويل: "د ټاکنو لومړی پړاو اوس تېر شوی دی. هيله لرم هغوی [د ټاکنو خپلواک کميسون او د شکايتونو د اورېدلو خپلواک کميسون] به په درغليو کې د ښکېلو افرادو نومونه رسنيو ته ورکړي. موږ دا کافي نه بولو چې د گوتو په شمېر خلکو په خاطر دې د رايو ورکولو بکسونه [له شمېر بهر شي.] موږ بايد هغه خلک وپېژنو چې د بلخ په ولايت کې يې درغلي کړي او زموږ له برخليک سره لوبي کوي."
محمد عارف انوري د بلخ پوهنتون محصل او د آی ډبليو پي آر تر روزنې لاندې خبريال دی.
