Institute for War and Peace Reporting | Giving Voice, Driving Change

په يو افغان ګوښه ولايت کې د آی ډبليو پي آر د رسنيو مرکز

د رسنيو مرکز به ارزګان له بهرنۍ نړۍ سره ونښلوي.
By IWPR Afghanistan
IWPR's new resource centre for journalists in Uruzgan. (Photo: IWPR)

د افغانستان د آی ډبليو پی آر ليکنه
د افغانستان د مرکزي ولايت ارزګان د ژورنالستانو اړتياوو ته په غبرګون کې د آی ډبليو پي آر په کمپيوټرونو او انټرنټ سمبال  د رسنيو مرکز جوړول له تاوده هرکلي سره مخامخ شو، چې دمخه پکې د وسايلو د کمښت له امله په خپل مهال د رپوټ ورکول ناشونې خبره وه.
ارزګان د افغانستان يو وروسته پاتې ولايت دی. د ګوتو په شمېر خبريالان پکې کمپيوټر او انټرنيټ ته لاسرسی لري. تر دې دمه به خبريالانو د ولايت په مرکز تيرينکوټ کې له نورو دفترونو څخه د خپلو رپوټونو د لېږلو لپاره د هغوی د معلوماتي تکنالوژۍ (IT) اسانتياوې  په سوال کارولې. ځايي خبريال، احمد شاه جواد د فبرورۍ په مياشت کې آی ډبليو پي آر ته له دې لارې خپل رپوټ استولی و: د انټرنيټ د نشتوالي له امله يو افغان ولايت ګوښه پاتې دی 
د افغانستان لپاره د آی ډبليو پي آر مسؤول، نور رحمن رحماني وويل: «د هېواد د نورو برخو افغانان او نړيواله ټولنه د نوموړي ولايت د وضعې اوحالت په اړه ډېر لږ معلومات لري.»
د افغانستان د آی ډبليو پي آر ادارې ددې ستونزې د هوارولو لپاره په تيرينکوټ کې يوه څانګه پرانستله، ترڅو خبريالان وکړای شي له دې لارې خپل رپوټونه آی ډبليو پي آر او نورو خبري رسنيو ته واستوي.  
ځايي خبريالان وايي د انټرنيټ د کارولو له امله يې کارونه اسانه شوي دي.
د حکمت الله افتاب په نامه يو خپلواک خبريال وويل: «تر دې دمخه به شپې او ورځې له يوې ناحکومتي موسسې څخه بلې ته تلو، غوښتنه به مو ترې کوله چې د يو رپوټ استولو لپاره د انټرنيټ د کارولو اجازه راکړي. اوس دا ستونزه هواره شوې.» 
د نوموړي مرکز په پرانستې غونډه کې خبريالانو او د ناحکومتي موسسو او سيمه ييزه حکومتي ادارو استازو ګډون کړی وو. غونډه د ارزګان ولايت د حج او اوقافو د رئيس، مولوي حمدالله له خوا د څو مبارکو آيتونو په تلاوت پيل شوه او دعا يې وکړه چې د ارزګان د خلکو غږونه د نړۍ بېلابېلو برخو ته ورسيږي.
د [ارزګان] د والي د دفتر په استازيتوب، الحاج عبدالرحمن خان رسنۍ د ټولنې «سا او روح»  وبللې، ويې ويل،  په ارزګان کې خبريالانو د خپلو خلکو ستونزې او برياليتوب بيان کړی او په دې توګه يې مهم او ارزښمن رول لوبولی دی.   
آی ډبليو پي آر خپل کار د افغانستان له لويو ښارونو څخه بهر ته غځولی او ارزګان له ځانګړې ننګونې سره مخامخ و. ځايي خبريالانو ته په پام کې نيول شوی ورکشاپ په لارو کې د طالبانو د شتون ګواښ څو اوونۍ له ځنډ سره مخامخ کړ.
ارزګان  د هلمند او کندهار له ناکراره ولايتونو سره ګډه پوله لري او د ياغيانو يو پياوړی مرکز بلل کيږي. 
رحماني وويل: «په نوموړي ولايت کې زموږ په وړاندې تر ټولو لويه ستونزه امنيت و. حکومت او بهرني پوځونه له تيرينوکوټ بهر ډېر لږ کنټرول لري. موږ اورېدلي وو، د يو شمېر ولسواليو خلک ... هغه خلک کافران بولي چې د حکومت تر لاس لاندې سيمو کې کار کوي يا اوسيږي.»
هغه زياته کړه: «د ياغيانو پر ګواښ سربېره هلته د برلاسي فساد او په حکومتي ادارو کې د شفافيت د نشتوالي په څېر نورې زياتې ستونزې شته. دې او دې ته  ورته نورو ستونزو په اړه تر اوسه معلومات نه دي خپاره شوي.»
سيمه ييز حکومت د آی ډبليو پي آر غوښتنې ته مثبت ځواب ووايه. د ارزګان د اطلاعاتو او فرهنګ رئيس، الحاج غلام حضرت وويل، د رسنيو [د] مرکز [جوړول]  «يوه ستره بريا» ده او په [دې] ولايت کې به ژورناليزم غښتلی او ښه همغږي به پکې رامنځته کړي.
د ارزګان د سرې مياشتې رئيس، اجمل هاند وويل، [دا] ولايت پياوړو خبريالانو ته اړتيا لري. هغوی بايد له هغو خنډونو او موانعو خپلواک وي چې ځايي زورواکانو رامنځته کړي دي.
هغه وويل: «رسنۍ په ټولنه کې ډېر اهميت لري. که يوه پاچهي نسکوره شي، نو ګوته يې رسنيو ته نيول کيږي او که عادی خلک قدرت ته ورسيږي، نو داکار هم د رسنيو له لارې ترسره کيږي.»   
د رسنيو [نوموړی] مرکز د اى ډبليو پى ار په  مرسته په ارزګان او ننګرهار کې د څيړنيز ژورناليزم د ودې او پراختياپه موخه جوړ شوی، عملي روزنيز ورکشاپونه پر مخ وړي او چاپی او صوتي رسنيو ته د رپوټ د چمتو کولو پر مهال د تجربه لرونکو خبريالانو له خوا زده کړه ورکول کيږي.
 

As coronavirus sweeps the globe, IWPR’s network of local reporters, activists and analysts are examining the economic, social and political impact of this era-defining pandemic.

VIEW FOCUS PAGE >