Institute for War and Peace Reporting | Giving Voice, Driving Change

د یوې بریالۍ مېرمنې کیسه

قانونپوهان له نوو تحولاتو سره مخالف دودونه نه مني او خلک هم دغې لارې ته هڅوي.
By IWPR Afghanistan

د کندهار په ولایت کې د یوازنۍ ښځینه څارنوالې په اړه د آی ډبلیو پي آر رپوټ ملي او نړیوال پام ځانته اړولی او همدارنگه ځايي ښځو ته د یو ستر الهام په توگه د ستاینې وړ گرځېدلی.  

د کندهار په څارنوالۍ کې د ۲۶ کلنې زینب او د هغې د کار کیسه د طلوع خبري سرویس، سلام وطندار رادیو، بي بي سي او گارډین ورځپاڼې خپره کړې ده.

(وگورئ: د کندهار یوازنۍ ښځینه څارنواله)

زینب یو نیم کال دمخه د کابل پوهنتون د شرعیاتو له پوهنځي څخه تر فارغېدو وروسته د کندهار په څارنوالۍ کې د ښځو په وړاندې د تاوتریخوالي د منځه وړلو په څانگه کې کار کوي. د هغې کار له دې امله هم مهم دی چې د محافظه کاره دودونو له امله زیاترو ښځو ته سخته ده، نارینه څارنوال ته خپله ستونزه ټکي په ټکي ټوله بیان کړای شي.

زینب آی ډبلیو پي آر ته وویل، د هغې په اړه له خپاره شوي رپوټ وروسته يې چې کوم پام او هرکلی تر لاسه کړی د هغې د لوړ اعتماد لامل شوی.

زینب وویل: «له آی ډبلیو پي آر څخه صادقانه مننه او د هڅو ستاینه يې کوم، چې زما د اعتماد او شهرت له لوړولو سره يې مرسته کړې.»

د آی ډبلیو پي آر رپوټ له ځنډه پرته د کورنیو رسنیو پام ځانته جلب کړ.

د طلوع خبریال، عبدالقدیر تکین وویل، هغه له زینب سره د آی ډبلیو پي آر رپوټ د خپلې ورځپاڼې د مرکې له لارې واورید.

په کندهار کې د سلام وطندار رادیو خبریال، محمد رحیم هم د آی ډبلیو پي آر رپوټ خپور کړی دی.

هغه وویل: «د زینب په اړه د آی ډبلیو پي آر رپوټ زما خوښ شو او له لوستلو وروسته مې ډېر ژر له هغې سره اړیکې ونیولې. د هغې په اړه مو ښځو ته د خپلې مجلې لپاره رپوټ چمتو کړ.» هغه زیاته کړه، دغه رپوټ د کارکوونکو او اوریدونکو له زیات هرکلي سره مخ شو.

رحیم وویل: «زه هر سهار د آی ډبلیو پي آر ویب پاڼه او په ځانگړي ډول د افغانستان په اړه رپوټونه گورم، تر څو له نوو موضوعگانو څخه خبر شم او د خپل رپوټ لپاره يې وکاروم.»

د کندهار پوهنتون د انتروپولوژۍ [بشر پېژندنې] پخواني استاد، حیات الله رفیق وویل، دغه راز رپوټونه پراخ ټولنیز اغېز لري، نور خلک هڅوي چې خپله وړتیا وکاروي.  

هغه وویل: «ټولې رسنۍ باید د آی ډبلیو پي آر په څېر خپل مسؤولیتونو په پام کې ونیسي. د هغوی خبریالان ښايي شاوخوا وگرځي او د دغه راز اغېزمن رپوټ په څېر د رپوټونو د چمتو کولو لپاره هلې ځلې وکړي.»

د کندهار مدني فعال، عبدالصمد وجدان وویل، رسنۍ مهم رول پر غاړې لري چې ښايي ويې لوبوي. د  پیاوړو نارینه گانو او ښځو پر بریاوو رڼا واچوي او له دې لارې مدني اشتغال ته وده ورکړي.

وجدان د کندهار پخواني اوسیدونکی دي، هغه وویل، تر دې دمخه يې د زینب نوم او د هغې د بریالیتوبونو په اړه معلومات نه درلودل. اوس وايي چې پر ټولنې به د هغې د بریالیتوب کیسه پراخ اغېز وکړي.

د کندهار د استیناف د څارنوالۍ رئیس، عبدالرحمن کوشان د هغه له دې خبرې سره موافق دی.

هغه وویل: «زه د زینب له کار څخه خوښ یم، ځکه له یوې ورځې نه بلې ته ښه کیږي. هیله لرم نورې ښځینه څارنوالانې هم د هغې په څېر خپلې ټولنې ته خدمت وکړي.»

پښتنه د کندهار د خصوصي پوهنتون د حقوقو د دویم کال محصله ده. هغې  وویل، د زینب کیسې تر اغېز لاندې راغلې او غواړي چې له فراغت وروسته په څارنوالۍ کې دنده اجرا کړي.  

په یوه هېواد کې چې ټولنیزه انگېرنه (کړه وړه) د هغو نجونو پر وړاندې اغېز کوي، چې خپلو زده کړو ته د عمر تر ډېره وخته دوام ورکوي، د زینب کیسه په ځانگړي ډول الهام بښونکې ده.

د کندهار ولایت د حضرت جي بابا په سیمه کې یو هټیوال، خیرمحمد آی ډبلیو پي آر ته وویل، غوښتل يې چې خپله ۱۴ کلنه لور د چم او مالت د اوسیدونکو د ملنډو او پېغورنو له امله له ښوونځي څخه وباسي.

کله چې يې له رادیوگانو څخه د زینب کیسه واورېده، ويې وپتیله چې د محافظه کار تعصب په وړاندې مبارزه وکړي او خپله لور پريږدې زده کړو ته دوام ورکړي.

خیرمحمد وویل: «زه به د نوي ښوونیز کال په پیل کې خپله لور بېرته ښوونځي ته ولیږم چې په اووم ټولگي کې زده کړو ته دوام ورکړي، تر څو د څارنوالې زینب په څېر خپلو خلکو ته خدمت وکړي.»

As coronavirus sweeps the globe, IWPR’s network of local reporters, activists and analysts are examining the economic, social and political impact of this era-defining pandemic.

VIEW FOCUS PAGE >